_সমভুনাথ মাহাতঅ
কাটইন মাসেক তইললে বইরসা নিহি লেখনে হেউএক কহিকুন নিরন মাসেক তাইতে সভে জিউ অকবকাত। ছটঅ খাটঅ সেতিআ, নহর, নালা, গেড়িআ সভে জিজাই জাইক। পাইখ-পাখুড়, গরু-কাড়া আর সভে জিউ জনুআর সহ মানুস বইরসা পানিক অভাবে আর রউদেক ঝাঁইঝে গাছে, ঝুঁড়ে, টালে, ডাইরে-পাতে ঠেহড় লেত। এহে সঁগকটলে বাঁচে ধরতি মাঁইএক করাঁই বইরসা পানি গিরাউএক আরদাসে রহিন পরব হেউএক।
জেঠ কোঁকুন ১৩ দিন রহিন দিন নেতে মানিক ই পরবটা হেউ এক।
রহিন দিনেক অনগুতেই মানে বেরা উগেক আগুএ ঘারেক পাঁচিরে গবরেক
বেড় দেথিক। বিহানে ঘার আনগা লিপা লরা করত। কুঁঅরি বেটিছউআরা
নিহেলে বেটাছউআরা সাঁঝ বেরিই নউ ঢঁকি নিহিতঅ পেছিই খেত লে
মাটি উভি আনত। রহিন মাটি আনেক আগু পেছিআ, বউগি, সের, পাই-
পইলাকে চারেক গুঁড়ি পানিই গরিকুন সাজাউঅত আর গুঁড়িক উপর
সিঁদুর টিকা দেথিক। এহে মাটিটাকে রহিন মাটি কহথিক। এহে মাটি
আনাটা লেইকুন কাঁহুঁ কাঁহুঁ মেলা লাগেইক। আনেক খনে মাটি ঢঁকিই
নিহিতঅ খাঁচিই ভরি মুড়ে লাদল বাদে পেছুবাটে হুলকত নিহি আর কাকরঅ
সঁগ কাথা নি কহত, এক মনে ঘার আনিকুন তুলসিপিঁড়হাঁই রাখত। তাকর
বাদে ভাঁড়ার ঘারেক তিনটা কুনে একটা করি ঢেলা রাখত আর তুলসি
পিঁড়হাঁক তিনটা কুনে একুকটা ঢেলা দেথিক। বাদবাকি মাটিটা কর্ন দিরখাঁই
নিহিত ঘারেক কনঅ ঠিন জুইত করি রাখি লেত কাহে ন এহে মাটিটাকরে
একুকটা চুলা বিহন ধানেক সঁগ খেত লেগে হেউএক। রহিন দিনে পাঁচিরে গবরেক বেড় দেলে বিসআউলা সাঁপ ঘার সামাত নিহি। রহিনমাটি হেলেক এসন মাটি জেটাই বিহিন-বুনা করলে অহে ধানেক আর আবাদেক রগ নি হেউএক। কারন নিরন দিনে মাটিটি সুরুজেক তাইতে পড়েক আর আবাদেক রগ লাগেক জিউ, পকা-মাকড়গিলিন মরি জাত। এহে খাতির রহিন মাটিটা মরাঘারে ঘাটে সিনাইকুন টিকা দেখিন। রহিন হেলেক চাসারাক বিহন বুনা করেক পুইনহা করেক দিন। কাহে ন
রহিন আটদিনেক ভিতর বিহন বুনাক আসল সমই। রহিন দিন পেইরালেই ডা ধরেইক মানে একুকদিনকে ভিনু ভিনু নামে ডাকথিক। জেসন আমডা, নিমডা, ভুমডা, তিতকিডা, নিরবিসড়া, দাঁতখিসড়া, হাইভাত, কুহুভাত। হাইভাতেক দিন চাসারা বিহন বুনা করত নিহি। উদিন বিহন-বুনা করলে চাসারাক ধান ভালঅ নি হেউএন, খাইএক টান হেউএন। নিরবিসড়াক দিন বিরহি, কুরথি, কলাই আর এহে লেখেন ডাইল জাইতেক বিহন বুনত। দাঁতখিসড়াক দিন জনহাইর বুনলে ঘুঁসেক নিহি হেবে করেক তেঁই ইদিন জনহাইর বুনেক দিন। রহিন দিনেক বাদেক পহিল দুইটা দিন হেলেক মাগন-জাঁচন দিন। এহে দুইদিনে চাসারা কাকউ কনঅটা মাগথিন নিহি আর দেখিনঅ নিহি।
রহিন দিনটা হেলেক চাসাকর বিচপুইনহা করেক দিন। কাঁহুঁ কাঁহুঁ ইটাকে ধানপুইনহা কহত। রহিন দিনটা এসন সগুনেক দিন চাসারা মানত জে দিনটাই বিচপুইনহা করি রাখত মানে এহে দিনটাকে সগুনেক দিন ধরিকুন বিহিন ধান পহিল বুনত হেলে বিহিনগাড়হিই পহাধানগিলিন নিরগি হেউএক। বিচপুইনহা করেক নেগ হেলেক ঘার আনগা লিপা লরা করিকুন ঘারেক একটা মরদনাঁই নখ টুগাউএন নাউকা ঠিন আর নাহাইকুন নউতন লুগা পিঁধিকুন একটা নউতন বউগিই বিহিন ধান লেত। ই কামটা উপাস রহিকুনে করত। ঘার ভিতরে বউগিই বিহিন ধান সাজত আর একটা নউতন লুগা নিহিত ইজর ভিজাউঅল গামছা ঢাঁপিকুন আনগা বাহরাই মুড়ে লাদত আর খেত জাত জাঁহাঁ আগুলেই বিহনগাড়হি বাহল রহেক। বিহিনগাড়হিক একটা কুনাঁই পুরুব বাটে মু করি বসত আর ধরতি মাঁইকে সেঁউরি বিহিনগিলিনেক তিন মুঠা নিহিত পাঁচ মুঠা ধান বুনত আর মাটিই চাঁপাউঅত। আর ভগতিভরি হাঁঠুগাড়ি ডনডবত করত। এহে কামটাকে বিচপুইনহা কহত। একর বাদে বাদবাকি ধানটা সহ বউগিটাকে আগুক নিঅর লুগাঁই চাঁপাই ঘার আউঅত। ঘার লে বিহিন ধান লেইকুন ঘুরি ঘার ঘুরা তড়িক কাকরঅ সঁগে কনঅ বাত করত নিহি, গটা কামটা এক মনে এক ধেইআনে করত। ছুইত হেলে বিচপুইনহা করত নিহি। ছুইত পেইরাইল বাদে কনঅ একটা দিন দেখি রহিন মানত। রহিনেক ঘুরিদিন লে বিহনগাড়হিই বিহিন. বুনত। ইটা রহিন আটদিন তড়িক চলেইক। এহে রহিন ছেঁকিই বিহিন করলে ধান নিরগি হেউএক। রহিন দিনে টুইএকঅ বইরসা হেলে উ বছর পানিই টান ধরেইক। সমবছর ঠিক ঠিক পানি হেউএক আর চাসে সমফলা ধান হেউএক। ধান ঢেইর হেউএন আর চাসারাক খাইএক টান নি হেউএন। সাঁপেক বিস কমি জাইন। রহিন দিন রাইতে ভাত খাইএক আগু একুক খেচা রহিন ফর খাইকুন ঘারেক লক নিদাত। রহিন ফর খালে বিসআউলা সাঁপে নিহিত পকা মাকড়ে বিঁধলে সাঁগি বিস লাগেইন নিহি এহেটা লগেক পততুক।
রহিন দিন কেহু কেহু তুলসি পিঁড়হাঁই পুজা পাসা করত, গেড়অ কাটথিন। আর সরাবনেক সেঁসে জাখরা মনসাপুজা নি করে পারলাহাত ছুইতেক কারনে অহে ঘারগিলিনে রহিন দিনে পুজা করত। এহে নেগটাকে রহিনপুজা কহত।
রহিন দিনে তুলসি পিঁড়হাঁই জে পুজাটা করত আর রপা মাসেক সেঁসে মনসা পুজাক সঁগ মিল আহেক। কাহে ন রহিন দিনেক বাদলে ঠিক ঠিক বইরসা হেলে ভালঅ চাস হেউএক। তেসনে খেতে রপি উঠল বাদে ঠিক ঠিক বইরসা হেলেগানি ধান চাস সমফলা হেউএক। এহে কারনে রহিনে আর মনসাপুজাঁই চাসারা তুলসিপিঁড়হাঁই পুজা করত – হাঁস বলি দেখিন। মনসাপুজাটাউ জেসন পানিক পুজা হেকেক তেসনে রহিনপুজাটাউ হেকেক পানিক পুজা। রহিন পুজাঁই সমবছর ঠিক ঠাক বইরসা জেসে হেউএক এহে আরদাস লেইকুন এহে আরদাস করি পুজা করত।
